"NNU SUSPIRU"

Partiempo 'na matina m'era zàtu
ca m'era 'cortu castaci lusciscia,
Lu sole ncora nu era spuntiddratu,
nuddru morsiceddru russu se vitia.

Arbata e profumu t'aria marina,
ste cose me ticiene: Vanne a mare.
Me decisi, pijai la varculina
te le funtaneddre e me misi a uvare.

E me quardava dr'arba chiara chiara,
lisciu lisciu e limpitu dru mare.
Senza 'me 'corgu, 'nanzi 'la tunnara
me  truvai, sia ca stava pe sunnare.

Chianu su dru specchiu t'acqua uvava.
Appena 'nu miju m'era 'luntanatu,
ntisi 'na oce ca me chiamava
e me girai: rimasi stralunatu.

Dru celu cusì limpitu, turchinu,
dru mare tuttu beddru, trasparente,
dru viulettu, dru verde e celestinu
m'erene mbriacata tutta la mente.

Era Caddripuli - Cuardame! - Ticia.
'Nu suspiru forte forte jeu manai.
Mijuni te riflessi  a 'mare facia.
- Hai ragione - tissi: - Si 'beddra! Critai.

Senza panzare to fiate me farmai;
tissi: - A 'nanzi cchiui nu pòzzu scire;
stu spattaculu, crande Ddiu, ca me t'hai
osci, me l'aggiu propriu te cutire.

Tutta china te brillanti me pariu
e de petre preziose nturnisciata;
cchiu beddra nu 'la putiu fare Ddiu.
Paria Venere appena 'disciatata.